قام أحد المغرديين السعوديين في موقع التواصل الاجتماعي تويتر بإنشاء هاشتاغ ساخر قانون السواقة السعودية وذلك للحديث عن سلبيات وطرق القيادة عبر انتقادها بتعليقات ساخرة ومن هذه التعليقات:
- كل واحد يعتقد انه يمتلك الشارع
- فيه واحد لازم عند كل اشاره حمراء يجي يوقف سيارته اول واحد ويوقفها بالعرض اذا ولعت لف يسار
- معك سيارة قديمة تزاحم فيها الناس واذا صدمك واحد تقوله شكرا كذ تمشي اما معك سيارة جديدة والله ماتمشي
- يجيك واحد ساد الشارع ويسولف مع خويه وادق له بوري وخر يقولي اصبر شوي،انا ودي ادعسه بس ما تسوى اصلح سيارتي في الصناعية
- عند وقوفك عند الإشارة لازم تكون متعديها شوي ولاتمشي إلا بعد البوري الثاني لأن أول واحد يستهبل يبيك تقطعها
- قانون الغاب " القوي يأكل الضعيف يعني معك اكسنت وتشوف جيب داخل عليك خلك مؤدب واسكت والعكس بالعكس
- السواقين والتاكسي والأجانب ما لهم حق مثلك يا بطل في الطريق إنت ابن البلد والأولوية لك.. لا ومعترضين على ساهر
- إذا شفت سيارة قدامك تروح يمين ويسارلا تتوقع السواق سكران .. لا هذا يا يرد بالواتساب أو يغرّد بتويتر!
- يُسمح للشاب أن يلعن ويسب لكل السائقين من حوله وذلك لان كلهم مايعرفون يسوقون وهو لحاله السواق البطل
- ماسك اقصى اليسار ويبغى يعدي لأقصى اليمين في ثواني والكل يوخر عنه ..
- دوسة الفرامل والبنزين على حسب إيقاع الأغنية
- اذا اللي قدامك ما وخر لك عشان تمر , مسموح لك تجي من جنبه و تشطفه وحبذا لو تنقز المراية
- معاك سياره جديده وخايف عليها ,, حقك مهضوم بالشارع
- يشوف البنت بتقطع: " خلها تعدي مسكينة "يشوف ولد بيقطع: " وربي ما تعدي من قدامي "
- اللي معه جيب او شاص مايوقف عند الاشاره يطلع من فوق الرصيف ويكمل طريقه
- الدوران مفاجئ الانحراف مفاجئ الفرامل ايضآ مفاجئ. يعني بالعربي معتمدين على المفاجات. وشكرآ
- تبي تلف لا تدق اشاره هاجمهم بسرعه ويوقفون لك :) تسوي محترم ومتقيد بتعاليم السواقه، يا انك بتخيس ساعتين وانت مالفيت
- لسهولة تغيير المسار يجب عدم استخدام اضواء مؤشر الالتفاف (فليشر) وذلك للاثر النفسي الذي يتركه على السائقين من حولك
- مافي احد يحط احزام امان وعند الاشاره اللي يطش اشياء من السياره حقته ولاشايب كل روس عياله طالعه من الشباك
- للأسف أغلب الشباب يسرع وتحس إنه رايح لحالة إسعاف أو أو ... يطلع في الأخير رايح عالإستراحة عند الشباب
لمتابعة أحدث جولاتنا في المدونات العربية عبر صفحتنا على موقع فايسبوك، اضغط هنا وابق على اطلاعٍ بأحدث المستجدات، كما يمكنك متابعتنا على تويتر بالضغط هنا.
