ستشهد مصر يوم غد وبعد غد 23/24 مايو 2012 عرساً ديمقراطياً لم تعشه من قبل بسبب انتخابات الرئاسة، وللمرة الأولى منذ ثلاثين عاماً يجهل المصريون من سيكون رئيسهم؟، ومع اقتراب الموعد اشتعال ساحات المنافسة والنقاش ما بين مؤيدي كل مرشح، برزت مجموعة "مقاطعون" وهي مجموعة ستقاطع الانتخابات كونها تتم تحت حكم العسكر، وقد أنشأ المغردون هاشتاغ #مقاطعون لمناقشة موضوع مقاطعة انتخابات الرئاسة المصرية ما بين المؤيد والمعارض لفكرة المقاطعة:
@hanielbanna الناس المقاطعون دي اسمها سلبية مقاطعتك مش حتغير من الامر شئ واحتجاجك لن يغير نتيجة الانتخابات وبصراحة ده ضعف مش قوة
@MinaMamdou7 انك تكون مقاطع عن اقتناع ....احسن ما تكون مشأرك تخليص حق
@Ledogym اللي بيقول المقاطعه قمه الايجابيه لاسقاط العسكر!!طب مشيلتش سلاح ليه و روحت جبت المشير في شوال طول السنه و نص اللي فاتوا يا ايجابي
@ibnmisr هتقول ايه لنفسك لما تمسك ورقه التصويت وانت عارف ان بعضهم متهم او متخاذل او ساكت عن جرائم قتل الثوار والعذريه والاعتقال
@AmePassionate وياترى بقى اجتماع مقاطعون هايخلص على ايه مش هايشوفو اخبار بكرة ولا هايفتحو تويتر ولا فيس بوك
@BolaShokry صديقي المنتخِب, هل تعلم ان مرشحك لا يعلم ما هي صلاحياته وفي انتظار مجلس مبارك العسكري ان يحددها
@Foxarito أنا مقاطع .. عشان بعد سنه و نص من قتل و سحل و تعذيب و اعتقال و مفيش مطلب بيتحقق كامل من الغفله اني اصدق ان انتخابات الرئاسة نزيهه
@Amira_Muhammed رايح تنتخب رئيس ماتعرفش صلاحياته وموافق على إعلان دستوري من مجلس عسكري ملوش شرعية، يعني بتديله شرعية يفضل موجود في الحكم
@HebaFarooq المقاطعه مش حل..بس التصويت هيزود المشكله باعطائه شرعيه للعسكر الذي سيتحول من مجرم الي مراقب ع الديمقراطيه ومتقرفوناش!
@IbrahimMubarak نفسى حد يقنعنى ايه فائدة المقاطعة لو مكانش عدد المقاطعون كبير. أنا شايف ان المقاطعة بالمنظر ده هى مجرد سلبية لا أكثر ولا أقل
@donyasamir انضم الآن لحزب الكنبة فرع مقاطعون واكسب انك الوحيد الي حيبقى ما غلطش لأنك ببساطة ما تحركتش واستمتع بالتريقة على الأخرون وقولهم مش قولتلكوا
@nasrwatt على فكرة اكتشفت ان اقناع المواطن بالمقاطعة او حتى انك تنشط الفكرة فى دماغه اسهل من اقناعه بمرشح
@Sydolyism أحلى حاجه الصمت الأنتخابى وأنك تكون مقرر انك مقاطعون يا سلام ع تفسيه الدماغ وبرضه يسقط رئيس مصر القادم
@Elho_Osiny اللي عايز يقاطع م يقاطع و يقعد ف بيته و يسكت ... ايه لازمتها مؤتمر و بيان هتفضحوا الثورة أكتر م هي مفضوحة
@MoemenShaaban انا حاسس كدة اللى هيقاطع الانتخابات ده عامل زى اللى قدامه حلة محشى و هو جعان فشخ لكن مش هياكل عشان مش لاقى الفوطةاللى يمسح فيهاايده
@NabilyoN مقاطعة الأنتخابات ليها ايجابيتها و ليها سلبيتها..وكذلك المشاركة فى الأنتخابات ليها ايجابيتها و صحتها وليها سلبيتها
@HebaAbdulKhalek الدعوة لمقاطعة النتخابات في الوقت ده بتفكرني بالعصيان المدني اللي فشل بشكل منقطع النظير
@AMontasser هو منين الاعتراض على المقاطعة إنها فردية ومش مؤثرة ومنين المقاطعين هم اللي هينجحوا الفلول؟! دوروا على حجة تانية لفشل مرشحكم
@bastaweeesy انا شايف ان المقاطعة دي شئ سلبي .. احنا لازم نروح و نشارك .. و نعلم على كل المرشحين و نشتم المجلس العسكري في ورقة الانتخابات
@AhmedAbdlAleem المقاطع أكثر ضرراً ممن صوّت للفلول، فالمقاطع عبّر عن توجهه الإيجابي بشكل سلبي، والفلولجي عبّر عن توجهه السلبي بشكل إيجابي
شاركنا برأيك في التعليقات: هل أنت مع أو ضد فكرة مقاطعة انتخابات الرئاسة المصرية؟
لمتابعة أحدث جولاتنا في المدونات العربية عبر صفحتنا على موقع فايسبوك، اضغط هنا وابق على اطلاعٍ بأحدث المستجدات، كما يمكنك متابعتنا على تويتر بالضغط هنا
